“É unha resposta excepcional a unha crise excepcional”, afirma o presidente González Formoso, que subliña que a achega suporá “duplicar” o orzamento dedicado a emprego este ano
O pleno da Deputación da Coruña aprobou hoxe un expediente modificativo de créditos por importe de 21.017.231,40 euros, cos que se financiarán diversos investimentos destinados a paliar as consecuencias sociais e económicas da Covid-19. O expediente foi aprobado cos 30 votos favorables de PSOE, BNG, Partido Popular e Alternativa dos Vecinos e unha abstención do deputado de Marea Atlántica.
Entre as medidas que se financiarán con estes fondos destaca unha nova liña especial do PEL, dotada con 10 millóns de euros, para apoiar as pequenas empresas e autónomos da provincia da Coruña especialmente afectados pola pandemia.
“Trátase dun programa ambicioso, dotado con 10 millóns de euros, que na práctica supón duplicar o orzamento anual do PEL. É unha resposta excepcional a unha crise excepcional”, afirmou o presidente da Deputación, Valentín González Formoso, que anunciou que o goberno provincial traballa xa nas bases do programa se desenvolverá en estreita colaboración cos concellos da provincia para amortecer as consecuencias económicas que a crise ten para as pequenas empresas e autónomos da nosa provincia.
“Poderíamos parapetarnos en que a Deputación non ten competencias en materia de apoio ao tecido empresarial, pero os 83.000 autónomos desta provincia non o entenderían”, afirmou o presidente, que lembrou que ” co respaldo de todas as forzas políticas, esta Corporación vén facendo unha aposta moi potente e transversal polo emprego e dinamización económica”.
“Pasamos dos 1,3 millóns de euros que había para emprego cando chegamos ao Goberno en 2015 aos 20 millóns que investiremos 2020”, apuntou González Formoso, que lembrou que a Xunta destinará a un programa similar 16 millóns para toda Galicia.
O modificativo de créditos aprobado hoxe contempla tamén unha importante inxección económica extraordinaria de 8.700.000 euros para o Plan Único (POS+2020), que suma xa 66,2 millóns aprobados este ano para financiar servizos básicos municipais ou obras financeiramente sostibles, contribuíndo así a reactivar a economía e o emprego.
Como principal novidade, os concellos poden destinar este ano parte dos fondos do POS+2020 (4 millóns de euros) a financiar gastos sociais extraordinarios derivados da Covid19. Compra de EPIs e potenciación dos servizos de Axuda no Fogar son os principais destinos destes fondos.
Dentro dos 21 millóns aprobados hoxe, inclúense tamén 160.000 euros para dotar de material como equipos de comunicación e vehículos ás agrupacións de Protección Civil, que tiveron un papel fundamental durante a pandemia e 60.000 euros para un convenio de colaboración co Banco de Alimentos Rías Altas, que veu notablemente incrementada a súa actividade social durante o estado de alarma.
A Deputación da Coruña levou a cabo durante os últimos meses unha reestruturación dos orzamentos 2020 para adecualos ás necesidades actuais da provincia, priorizando os investimentos destinados a crear emprego, reforzar os servizos sociais e reactivar as economías municipais tras a crise da Covid19.
Parte dos fondos para financiar estas medidas urxentes proveñen da reasignación das partidas programadas nos orzamentos 2020 da Deputación pero que este ano non puideron ou non van a poder ser executadas a causa das restricións provocadas polo coronavirus: eventos de promoción turística en feiras no estranxeiro, campionatos deportivos que foron suspendidos ou aprazados, grandes festivais musicais ou eventos coma a Mostra de Encaixe de Camariñas, que este ano non puido celebrarse por primeira vez en tres décadas.
Luz verde ás primeiras 231 obras do POS+2020
O pleno aprobou tamén, por unanimidade de todas as forzas políticas, os primeiros 41,2 millóns do Plan Único 2020, dos que preto de 50% (19.377.684,66 euros) se destinarán a financiar a execución de 231 obras solicitadas polos propios concellos en función das súas necesidades. Unha cifra importante que seguirá incrementándose con 15 millóns de euros aprobados no pleno de abril que aínda non teñen destino, pero que deben destinarse a investimentos financeiramente sostibles durante este exercicio.
Obras de humanización de rúas e espazos públicos, melloras en centros educativos e deportivos municipais, creación de xardíns e zonas verdes, obras de pavimentación, saneamento e abastecemento de auga en núcleos rurais son algúns dos investimentos que o Plan Único financiará este ano nos 93 concellos da provincia da Coruña.
O POS+2020 destina ademais o 35,6% do seu orzamento (14.695.633, 73 euros) ao sostemento de servizos públicos esenciais coma alumeado público, recollida de lixo e limpeza viaria en 77 concellos coruñeses, 1,56 millóns a reducir débeda de 16 municipios e 1,7 millóns de euros a axilizar o pago a provedores.
POS+2020: Resumo dos investimentos e distribución dos fondos por concellos e comarcas
4 millóns para gasto social poscovid
Como principal novidade, o Plan Único destina este ano un 9,5% do seu orzamento inicial ( 3.927.832,52 € , procedentes de superávit) para apoiar os concellos no financiamento dos gastos sociais extraordinarios derivados da Covid19 coma a atención domiciliaria e maiores e dependentes ou a adquisición de equipos de protección individual (EPI).
